Pagadian City (September 27, 2019) – Isip pagmugna ug hinanaling
aksyon aron pagpakgang sa African Swine Fever kon ASF ug uban pang makatakod
nga sakit sa baboy sa pagsulod sa probinsya, mipanday ug usa ka ordinansa ang Sangguniang
Panlalawigan aron sa pag-regulate sa pagbuhi, pagbiyahe, pag-ihaw ug pagbaligya
sa buhing baboy ug mga produkto niini, apil na ang pag-organisar ug usa ka task
force nga maoy molantaw sa kinatibuk-ang kalihukan sa lokal nga industriya sa
baboy.
Ang ordinansa No. 006-2019 nga
gipangunahan ni Board Member Rogelio J. Saniel, ang chairperson sa Committee on
Agriculture and Fishery, naglagda ug mga gikinahanglan nga aksyon aron
malikayan ang pagsulod sa ASF sa probinsya sama sa strikto nga pagsusi sa mga
pig farms, pig holding facilities, mga slaughterhouse, merkado, ug bisan pa ang
pagpamaligya sa buhing baboy ug ang karne ug ubang produkto niini.
Nalakip usab sa maong ordinansa
ang strikto nga pagpatuman sa animal disease surveillance ug monitoring system
sama sa animal quarantine requirement.
Ang CSD-Task Force kon Contagious
Swine Diseases Task Force, pinanguluhan ni Gov. Victor J. Yu, gimugna usab aron
mahimong main authority sa paglunsad ug information campaign mahitungod sa prevention
ug pagkontrol sa ASF lakip na ang paghimo ug mga rules and regulations alang sa
suspension o cancellation sa mga lisensya sa mga buhatan may kalabutan sa
negosyo sa baboy nga molapas unya sa nasampit nga balaod.
Dugang pa niinin, ang task
force gilauman usab nga makig-coordinate sa Bureau of Animal Industry,
Department of Agriculture, ug uban pang ahensya aron mapatuman ang siyentipikong
pamaagi sa pagkontrolar sa maong sakit sa baboy.
Matud pa sa maong ordinansa,
gidili ug illegal ang pag-transport sa mga baboy ug uban pang pork products sa
mga pantalan ug airport kon kini gikan sa mga lugar ug nasud nga apektado sa ASF,
ang pagbaligya sa mga karneng baboy nga walay hustong clearance gikan sa provincial
veterinarian ug lehitimong ahensya niini, ang pag-ihaw ug baboy gawas sa
gitugotan nga slaughterhouse, ug uban pang mga lagda.
Ang mapamatud-an nga personahe,
buhatan o korporasyon nga makaplagang nakalapas sa ordinansa, makamulta ug P1,000
apan dili motaas sa P2,000 ug pagkabilanggo dili muubos sa 2 ka bulan ug dili
molapas sa usa ka tuig.
Ang African Swine Fever kon
ASF usa ka makatakod nga sakit sa kahayopang baboy nga paspas nga mitakboy sa
dapit sa Luzon sugod bulan sa Agosto nga nagdala ug kabalaka sa local swine industry tungod sa epekto niini sa panginabuhi sa mga Pilipino ilabi na sa mga negosyante ug baboy.
