Photo from: Google
Pagadian City (Septembre 16, 2019) - Atol sa gipahigayong flag raising ceremony adlawng Lunes, Setyembre 16, 2019 sa may Provincial Capitol Complex, gibutyag sa gobernador sa lalawigan sa Zamboanga del Sur Hon. Victor J. Yu atubangan sa mga empleyado ang iyang plano mahitungod sa pagahimuong annual laboratory check up alang sa tanang empleyado sa provincial government sugod karung tuig 2020.
Sigun pa niya nga ang maong annual laboratory check up pagahimuon sa Zamboanga del Sur Medical Center. Sa maong check up kinahanglan makuha ang mga blood test sa tagsa-tagsa ka mga empleyado ug gidugang pa usab niya nga kung gikinahanglan makuha ang EKG apil ang ultrasound buhaton kini tungod kay gusto niya nga ang mga empleyado himsog ug anaa sa maayong panglawas tungod kay gusto niya mahibaw-an unsay angay buhaton aron mapugngan ang mga sintomas nga dili maayo nga makaapekto unya sa ilang trabaho.
Gibuhat niya kini tungod kay gusto niyang masiguro nga anaa sa luwas nga kahimtang ang panlawas sa mga empleyado ug kay dili lang puro trabaho ang asikasuhon. Iya kining gihatagan ug pagtagad isip amahan sa lalawigan aron maipakita nga dili lang ang mga empleyado ang dapat muhatag sa ilang serbisyo ngadto sa katawhan apan lakip na usab sila ang pagahatagan. Usa usab kini sa pagpakita nga gihatagan ug importansya sa amahan sa lalawigan ang matag-usa.
Dako usab ang kalipay sa mga empleyado tungod kay sa dugay nga panahon nahatagan sila ug importansya ug napakita sa ilaha nga aduna silay bili sa provincial government. Nasayran nga mao kini ang una unyang laboratory check up sa mga empleyado sa provincial government nga mahitabo sa lalawigan sa Zamboanga del Sur. Makita sa mga panagway sa mga empleyado nga malipayon kaayo sila sa maong balita tungod kay libri kini ug makatagamtam ang tanang empleyado sa lalawigan.
