Bayog, Zamboanga del Sur- Malampusong napahigayon ang Send-Off Ceremony of Retooled Community Support Program (RCSP) team sa lungsod sa Bayog sa nakalabayng Huwebes, Octobre 17, 2019.
Atol sa maong kalihukan anaa ang presensya sa kongresista sa ikaduhang distrito Hon. Leonardo "Jun" Babasa. Sumala pa niya nga dako ang iyang pasalamat nga namugna ang maong grupo tungod kay dako kini ug mahimung tabang sa pagpatunhay sa kahapsay ug kalinaw sa komunidad.
Gihimo ang maong kalihukan isip pagsuporta sa gipaabanteng programa sa provincial government mahitungod sa kahapsay ug kalinaw. Kini usab nga kalihukan ang adunay kalabutan sa executive order no. 70 nga pinirmahan ni Pres. Duterte nga nagkanayon "institutionalizing the whole-of-nation approach in attaining inclusive and attainable peace, creating a national task force to End Local Communist Armed Conflict (ELCAC), and directing the adoption of a National Peace Framework".
Kahinumduman nga usa kini sa gisaad sa Chairman sa Provincial Task Force to End Local Communist Armed Conflict (PTF ELCAC) Hon. Victor J. Yu, ang Provincial Governor sa lalawigan sa Zamboanga del Sur nga tapuson o tuldukan ang insurgency ilabi na sa 29 ka mga nailang mga apektadong barangay sa lalawigan sa Zamboanga del Sur pinaagi sa paspas nga paghatod sa mga nag-unang serbisyo.
Ang Sangguniang Bayan sa lungsod sa Bayog ang nagpasa ug resolution no. 1629, series of 2019 nga nagpahayag sa New People's Army (NPA) nga persona non-grata sa lungsod sa Bayog.
Nanghinaut usab ang provincial ug municipal government nga kini nga inisyatiba ang muhimu sa atong tagsa-tagsa ka mga komunidad ug nasud nga luwas gikan sa mga insurgencies ug sa mga anti peace nga mga grupo nga maoy nagdala ug hulga sa kahapsay ug kalinaw ug ingun man naghatag ug kasamuk sa mga katawhan sa taas nga panahon.
Ila usab giawhag ang mga katawhan nga mamahimung vigilante ug musuporta sa tawag sa gobyerno alang sa gipangandoy ug gitinguhang kalinaw ug seguridad sa publiko.
Dili nato suportaran ang mga walhung grupo kundili ato silang hangyuon nga mubalik sa sabakan sa gobyerno.
Daku ilang pasalamat usab ngadto sa mga DILG, AFP, PNP, Provincial Government sa lalawigan sa Zamboanga del Sur, ug sa Municipal Government sa ilang gihatag ug gipakitang suporta sa programa sa gobyerno.
