Pagadian City (Oktubre 25, 2019) - Gatusan ka mga pamilya nga nasunugan sa Brgy. Dumagoc ang midawat ug ayuda nga gisaad sa kagamhanang probinsyal pinaagi ni Gov. Victor J. Yu kauban sa mga kawani sa DSWD sa Provincial Covered Court, adlawng Biyernes.
Mahinumduman nga nakadawat ug tagsa ka sakong bugas ang mga biktima sa sunog nga gihatag usab sa probinsya sa nakalabayng bulan.
Sa iyang hamubong pakighinabi sa mga pamilya gipahayag ni Gov. Victor Yu nga nalangan ug gamay ang cash assistance tungod sa pag-verify sa listahan sa mga nasunugan.
Ang matag pamilya midawat ug P10,000 sumala sa saad ni Gov. Yu sa iyang pagbisita sa mga nasunugan sa Balangasan Gymnasium niadtong September 2.
Sigon pa sa gobernador nga bisan sa gamay nga kantidad, iyang gituman ang iyang saad aron matabangan ang mga pamilyang nasunugan sa ilang panginabuhian ug padayon nga mobangon bisan pa man sa ilang kahimtang.
Mapasalamaton usab ang mga pamilya nga midawat sa ayuda tungod kay makatabang kini sa ilang mga panginahanglan.
Mapasalamaton usab ang mga pamilya nga midawat sa ayuda tungod kay makatabang kini sa ilang mga panginahanglan.
