Pagadian
City (October 16, 2019) – Anaa sa 200 ka mga barangay captains ang nakadawat ug mga proyekto gikan sa
kagamhanang probinsyal sa pagpamuno ni Gov. Victor Yu, Congw. Divina Grace Yu
ug Cong. Leonardo Babasa atol sa gipahigayong panagtigom adlawng Miyekules sa
Executive Function Hall, Capitol Grounds, Pagadian City.
Kini nga mga proyekto ang
gipaabot sa unang batch sa mga barangay officials isip pagtuman ni Gov. Victor
Yu sa iyang saad sa nakalabay nga piniliay.
Gipahayag sa gobernador
nga ilang gipaningkamotan nga masustinir ang pagsalig sa katawhan alang sa ilang
pamunuan tungod kay giila niya nga importante ang tingog sa katawhan alang sa
kauswagan sa probinsya.
“Kabalo ko nga dako ang
pagsalig sa mga tawo sa atong administrasyon, mao nga ipaabot gyud nato sa
ilaha nga duna tay nahimo sa atong probinsya,” matud pa ni Gov. Yu.
Gidayeg usab ni Cong.
Divina Grace Yu ang mga opisyales sa barangay tungod sa ilang pagkugi ug
pagpaningkamot aron makabaton ug proyekto ang ilang mga dapit.
Gidugang pa sa amahan sa
probinsya nga dili lang igo sa pagsulbad sa problema sa komunidad ang
ginaatubang sa mga lideres niini kondili ang pagpakita ug mga lig-on nga
infrastructure aron mahingpit ang ilang accomplishment sa ilang barangay.
Sigon pa ni Gov. Yu,
naggahin ug P40M nga pondo ang provincial government gikan sa development fund
niini alang sa mga kabarangayan karong tuiga diin gamiton kini sa mga mapili
nga proyekto sa ilang tagsa-tagsa ka lugar.
Gidasig usab sa
gobernador ang mga barangay officials nga mo-coordinate sa mga municipal ug
barangay development coordinators nga gidesignate sa probinsya aron masayran
nila ang mga impormasyon mahitungod sa mga proyekto sa kasamtangang
administrasyon.
Gawas sa mga national
projects, gisulti usab pagbalik ni Gov. Yu ang iyang saad nga mopalit ug mga
ekwipo alang sa road maintenance sa mga kabarangayan. Matud pa niya nga ang
budget nga P300M ipalit ug mga bag-ong kagamitan sama sa 4 ka bulldozer, 10 ka
grader, 10 ka backhoe, 6 ka pison, ug 15 ka dump truck.
Gipaklaro niya nga ang
maong mapalit nga mga equipment ipagamit sa tanang kalungsuran nga walay bayad
o rental ug krudo lamang ang iandam sa mga mogamit nga LGU.
“Ang akoang gusto ipakita
sa katawhan nga tinuoray ang atong serbisyo para sa ilaha," pamahayag ni Gov.
Yu.
Gikalipay usab sa
gobernador ang mga landmark achievements sa iyang administrasyon bisan pa man
pipila pa lang kini ka bulan.
Matud pa niya nga ang
pagpatuman sa zero balance billing sa ZDSMC, ang pag-establisar sa Malasakit
Center ug ang mga proyekto nga naka-focus sa mga barangay pipila lamang sa
iyang gituman nga saad nga walay bisan gamay nga korapsyon nga ipaabot ngadto
sa mga katawhan.
