Closing Ceremony and Entrustment of Firearms gipahigayon alang sa 649 ka mga bag-ong miembro sa Philippine Army

Pagadian City (Oktubre 23, 2019) – Pormal ng mihural sa ilang katungdanan isip mga lehitimong miembro sa Philippine Army ang 649 ka mga bag-ong sundalo nga andam ng moserbisyo sa nasud human sila migradwar sa ilang Candidate Soldier Course nga gipahigayon sa Tabak Grandstand, Labangan, Zamboanga del Sur, adlawng Miyerkules, Oktubre 23.

Ang 649 newly ranked privates naggikan sa CSC classes 592, 593 ug 594 sa 1^st Infantry Division, Classes 595 ug 596 gikan sa 11^th Infantry Division samtang 25 ka mga sundalo ang gikan sa 54^th Engineering Brigade nga naka-base sa Zamboanga City.

Pinangunahan sa mga civilian stakeholders, ang Closing Ceremony and Entrustment of Firearms gitambungan sa mga pinasidunggang bisita nga sila Gov. Victor J. Yu sa Zamboanga del Sur ug Gov. Abdusakur M. Tan sa probinsya sa Sulu.

Sa iyang mensahe, gihatagan ug dakong gibug-aton ni Gov. Yu ang importansya sa mga gipiyal nga armas ngadto sa mga bag-ong sundalo isip timaan sa ilang dakong responsibilidad sa pagprotektar sa katawhan ug sa nasud. 

Giisip usab ni Gov. Tan sa Sulu nga ang maong kalihukan usa ka pagpamatuod nga ang kalinaw dili lamang makab-ot pinaagi sa nag-inusarang pundok apan gikinahanglan usab ang dakong suporta sa mga sibilyan ug mga ahensya sa gobyerno aron matuman ang tinguha sa matag usa.

Sa laing bahin, gipasalamatan usab ni Major General Roberto T Ancan, ang commander sa 1^st Infantry Division ang tanang personahe sa Division Training School nga migahin sa ilang oras ug kusog aron maumol ug maporma ang mga sundalo sa pagkahimong takus ug andam nga mga miembro sa nasudnong kasundalohan.

Giila usab ni Ancan ang gihatag nga inspirasyon sa mga ginikanan ngadto sa mga bag-ong sundalo ug sa ilang padayon nga pagsalig ug suporta sa Philippine Army.

Sa katapusan, gidasig ni Ancan ang mga sundalo nga sila nag-atubang sa bag-ong hagit sa ilang kinabuhi nga mao ang pag-una sa kaayuhan sa nasud sa dili pa ang ilang kaugalingon uban ang masaligan ug komitado nga pag-alagad sa katawhan.  

Moagi pa sa mandatory Infantry Operations Course ang mga bag-ong sundalo aron madugangan ang ilang kahibalo ug kahanas sa dili pa sila i-deploy sa mahagiton nga katungdanan.

Samtang tulo usab ka mga asawa sa mga bayani sa Marawi siege ang pormal nga nahilakip isip enlisted personnel sa Philippine Army atol sa maong kalihukan. Naila ang mga nasampit nga babaye nga sila Private Grace P. Allaga, Private Merzie G. Rogador ug Private Christine Mary E. Montero.

Pinasikad sa otoridad ni President Rodrigo Duterte, ang 3 ka mga balo boluntaryong miapil sa kasundalohan pinaagi sa special enlistment.