Nag-apod-apod ug cash assistance ug farm machineries ang Department of Agriculture ngadto sa mga mag-uuma nga apektado sa ubos nga presyo sa humay sa Zamboanga del Sur.
Gikan sa 16,671 nga qualified ka rice farmers, anaa sa 1,500 ka mga mag-uuma ang nakakuha sa cash aid gikan sa Land Bank of the Philippines atol sa launching ceremony sa Rice Farmers Financial Assistance (RFFA) Program nga gipahigayon sa Oval Sports Complex sa Provincial Government Complex adlaw nga Friday.
Mismong si Agriculture Secretary William Dar ang nahimong guest of honor sa maong event. Matud pa sa kalihim nga kabahin ang maong assistance gikan sa national government para sa mga mag-uuma nga apektado sa ubos nga buying price sa humay.
Sigon pa ni Dar nga giawhag ni Presidente Duterte ang tanan nga suportahan siya sa pagpangitag pamaagi aron matabangan ang mga mag-uuma ug mangingisda aron makabaton sila ug abundang ani ug dakong kita.
Dugang pa ni Dar nga ang RFFA program gigahin alang sa mga piniling mag-uuma nga dunay tungag ektarya ngadto sa duha ka ektarya nga yuta sa tanang mga probinsya sa nasud nga miagi na ug assessment nga nagkinahanglan ug tabang gikan sa gobyerno.
Ang mga farm machineries nga giturn-over sa maong kalihukan nagkantidad ug P160M ug tuyo niini ang pagpalig-on sa mga programa ug proyekto nga gi-implementar sa ahensya sa rehiyon.
Ang nasangpit nga mga makinarya mao ang mga mosunod: 4-wheel drive tractors, rice tansplanters, rice reapers, threshers , mechanical dryer, coffee huller, shredder, and mudboats.
Sa samang kalambuan, gipahayag ni Sec. Dar nga naggahin usab ang departamento karong tuiga ug P1.8-Bilyon nga mga proyekto para sa Zamboanga del Sur.
Ang maong mga proyekto naglangkob sa: Rice Farmers Financial Assistance- P83.3-M, farm to market road- P98-M, special project (TRDP) - P550-M, Insurance of farmers and fisherfolks ilalom sa Registry System for Basic Sectors in Agriculture (RSBSA) program –P150-M, establishment of slaughterhouse- P19-M for ZDS lakip na ang capital outlay nga nagkantidad ug P160-M.
Nagpasalamat si Governor Victor J. Yu sa Department of Agriculture sa paghatag ug financial assistance ug farm machineries sa mga mag-uuma ug mangingisda diin sigon pa niya nga 70% sa populasyon sa probinsya ang kadaghanan mag-uuma nga nagkinahanglan ug tabang gikan sa gobyerno.
Malaumon usab ang amahan sa lalawigan nga ang pag-abot sa maong mga kagamitan makadugang sa paglambo sa mga mag-uuma ug pagkamabungahon sa ilang kaumahan.
