Pagadian City (February 18, 2020) - Tungod sa hulga sa pagkuyanap sa
Coronavirus Disease (COVID-19), mipagawas ug memorandum ang Department of
Education nga nagsuspendi sa mga kalihukan sa mga eskwelahan isip preventive
measure batok sa maong sakit.
Sa gipahigayong press briefing sa
DepEd Region 9 adlawng Lunes, gihatagan ug katin-awan sa mga representante sa
buhatan ang pag-postpone sa mga dagkong aktibidad sa mga tulonghaan.
Sa pamahayag ni Dr. Eugenion B.
Penales, Chief CLMD (Curriculum and Learning Management Division), iyang
gipatin-aw nga ang kanselasyon sa mga activities sumala sa Deped Order No. 15
Series of 2020 base sa abiso sa Department of Health nga nagdili sa
pagpahigayon ug dagkong panagkatigom sa mga estudyante ug magtutudlo nga
nagkinahanglan sa travel ug congregation sulod sa bulan sa Pebrero.
Tungod sa maong order, kanselado
ang mga kalihukan sama sa National Schools Press Conference ug National
Festival of Talents nga ipahigayon unta gikan Pebreo 17 ngadto Pebrero 21
karong tuiga.
Sa local setting, lakip sa mga nakanselar
nga panakatigom sa mga rehiyon ang enhancement training for NSPC qualifiers ug
ang training for administrative officers sa DepEd.
Gidugang ni Dr. Penales nga nag-agad
sila sa advisory ug rekomendasyon sa DOH kon aduna man gali extension ang maong
memorandum order.
Mahitungod sa ubang lakang nga
gihimo sa DepEd batok sa COVID-19, gibutyag ni Dr. Meriam A. Indin, Medical
Officer IV nga nagpahigayon ug localized campaigns ang mga dibisyon ug distrito
sa ahensya aron mapahibalo ang mga tulunghaan mahitungod sa mga angay timan-an
aron mapugngan ang pagsulod sa maong sakit sa mga tulunghaan sa rehiyon.
Gidugang usab ni Dr. Pedro Melchor
Natividad, OIC Assistant Regional Director, nga duna silay close coordination
sa central office ug sa mga local health officials mahitungod sa mga updates sa
COVID-19.
Giawhag sa mga opisyal sa DepEd
Region 9 nga sundon ang mga health advisory gikan sa buhatan sa panglawas sama
sa proper hand and respiratory hygiene, safe food practices ug ang pagsuot sa
mask kon ugaling dunay respiratory symptoms ang usa ka indibidwal.
