Zamboanga del Sur (March 3, 2020) - Usa ka kanhing spokesperson sa Marawi Siege kaniadtong tuig 2017 ang bag-ong mamuno sa 53rd Infantry (Matapat) Battalion human sa gipahigayong change of command ceremony sa Guipos, Zamboanga del Sur adlaw nga Huwebes.
Si Lt Col Jo-ar Herrera mao ang mopuli kang Lt Col Marlowe Patria nga maoy ipahimutang sa posisyon isip Assistant Chief of Staff for Civil Military Operations, G7 sa 1st Infantry "Tabak" Division.
Si Herrera usa ka miembro sa Philippine Military Academy Class of 1999. Usa siya ka ranger ug topnotcher sa iyang klase sa Psyops Officers Course sa Fort Bragg, North Carolina, USA.
Migradwar siya sa kursong Master of Arts Major in Social and Development Studies sa University of the Philippines Baguio.
Iya usab nahuman ang iyang Command and Staff Course sa Goh Keng Swee Command and Staff College sa nasud sa Singapore, diin usa kini ka requirement sa posisyon nga iyang gihuptan karon.
Sa iyang assumption speech, gipasalamatan ni Herrera ang iyang pagkapili isip mosunod nga commanding officer sa 53rdIB.
Iya usab nga gipahayag ang importansya sa panaghiusa ug pagtinabangay sa mga stakeholders, komitado nga pagserbisyo ug ang kadasig sa mga kasundalohan sa pagtuman sa gisangon nga tahas alang kanila.
Iya usab gipasalig nga ipadayon ang nasugdan nga legasiya ni Lt Col Patria sa batalyon.
Gidayeg usab ni Maj. Gen. Generoso "Gene" Ponio, Commander sa 1st Infantry Division ug presiding officer, si outgoing battalion commander Lt. Col. Patria tungod sa iyang mga naangkon nga kalampusan.
Pipila lamang sa mga dagkong accomplishments ilalom sa pagdumala ni Patria ang pagkapukan sa guerilla front sa mga rebeldeng grupo sa probinsya, ang malampusong programa sa Youth Leadership Training, ug ang pag-surrender sa sobra 60 ka mga rebelde ug pagbalik niini sa sabakan sa gobyerno diin karon nakabenepisyo na sa integration programs sa national government kaabag ang kagamhanang probinsyal sa pagpanguna ni Gov. Victor Yu ug Cong. Divina Grace Yu.
Matud pa ni Ponio nga kampante siya nga kayang dad-on ni Lt. Col. Herrera sa mas dagko pang kadaugan ang 53rdIB pinaagi sa iyang kasinatian ug kahanas sa pagdumala.
Giawhag usab ni Ponio ang mga stakeholders sa pagsalig ug pagsuporta sa bag-ong battalion commander sa tumong niini nga mas mahimong malinawon ug progresibo ang lalawigan sa Zamboanga del Sur.
