Pormal ng nanumpa isip Chairman sa
Boy Scout ZDS-Pagadian Council si Gov. Victory J. Yu kauban sa mga bag-ong
officers ug members adlaw nga Lunes atol sa gipahigayong Local Council Executive
Board Meeting sa Provincial Capitol Complex, Pagadian City.
Atubangan sa mga opisyales sa
regional ug local council, gidawat ni Gov. Yu ang bag-ong tahas nga pamunuan ug
ire-organisar ang Boy Scout Council sa lalawigan human kini gidumala sa taas
nga panahon sa nakalabay nga administrasyon.
Sa iyang pamahayag, giila sa
gobernador ang dakong suporta sa kanheng liderato sa malampusong scouting
movement sa lalawigan.
Matud pa niya nga dili man niya
matupngan ang kadaghan sa mga narehistro nga boy scouts sa milabay nga
administrasyon apan iyang gisaad nga buhaton ang iyang mahimo aron madasig ang
mga kabataan sa pag-apil sa maong organisasyon.
Mahinumdoman nga miabot sa 65 ka
libo ka mga miembro ang natala sa BSP dinhe sa lalawigan ilalom sa kanheng
chairman.
Apan gipatin-aw sa amahan sa lalawigan
nga ang pag-apil sa BSP usa ka boluntaryo nga desisyon ug dili kini compulsory
o pag-obligar sa kabataan nga moapil.
“In my administration,
let us not consider quantity but our purpose is quality. This figure will
really absorb the Boy Scout principles by heart, not by fear, but by
inspiration,” matud pa ni Gov. Yu.
Iyang gipaklaro nga isip usa ka
lider, angay lamang nga dasigon ug pasabton ang mga kabataan mahitungod sa
katuyoan sa Boy Scout aron mamahimong epektibo ang pag-umol kanila ilabina sa ilang
karakter aron mamahimo silang produktibong lungsoranon.
