Pinakaunang Renewable Energy Powerplant Itukod sa Zamboanga del Sur

Zamboanga del Sur (Enero 9, 2020) – Sa pinakaunang higayon, usa ka planta nga mag-supply ug renewable energy ang sugdan na pagtukod sa lalawigan sa Zamboanga del Sur partikular sa lungsod sa Aurora.

Adlawng Miyerkules pormal nga gipahigayon ang groundbreaking ceremony sa 6MegaWatt Biomass Power Plant sa Brgy. Commonwealth, Aurora, Zamboanga del Sur, tinambongan sa mga lideres sa probinsya pinanguluhan ni Governor Victor J. Yu ug Congresswoman Divina Grace Yu kauban sa mga local officials sa lungsod sa Aurora ug mga representante sa Libertad Power and Energy Corporation (LPECO).

Sa iyang speech, gikalipay ni Governor Victor Yu ang pag-abot sa maong proyekto diin iyang giisip kini nga dakog ikatabang alang sa pagpalambo sa energy capacity sa probinsya.

Matud pa ni Gov. Yu nga suportado niya ang tanang renewable forms of energy tungod kay makatabang kini sa pagprotihir sa kinaiyahan ug makatabang sa ekonomiya.

Iyang gisaysay nga ang pagtugot sa mga renewable nga klase sa enerhiya nga mosulod sa mga lokalidad usa ka pamaagi nga mabalanse ang kalambuan sa sektor sa agrikultura ug mga industriya sa Mindanao.

Gipasabot usab ni Engr. Reggie Albano, Project Director, nga dili angay mabalaka ang mga katawhan sa pagtukod sa maong powerplant.

Matud pa niya nga dako kini ug potential tungod kay ang mga fuel nga gamiton aron sa pag-operate sa planta anaa sa lungsod makita.

Kompara sa geothermal, coal ug hydro-electric plants, mas praktikal nga alternative source of energy ang biomass plant diin ang mga pagagamiton nga material gikan sa lamang sa palibot, kini matud pa ni Albano.

Makabenepisyo sa maong proyekto ang mga mag-uuma tungod kay paliton gikan kanila ang mga materyales nga pagagamiton sa planta sama sa bunot sa lubi, uhot ug mga tipaka sa humay kon rice hulls.

Iya usab gipasabot nga dili makadaot sa kinaiyahan ang maong planta tungod kay carbon-neutral kini ug dunay electrostatic precipitator nga maoy mosala sa mga gitawag ug unborn fuel aron dili moadto sa atmosphere.

Gilauman nga mokabat sa 172,000 kg of agricultural waste kada oras ang ma-convert into fuel sa maong planta o 5.6Million kilograms kada bulan kon magpadayon ang production niini, matud pa ni Engr. Albano.

Gidugang usab niya nga ikalipay sa NGCP ang paghidangat sa maong proyekto nga makatabang sa low voltage problem sa probinsya.

Ang maong biomass plant nga gi-finance sa Libertad Power and Energy Corporation gi-expektar nga mahuman sulod sa 20 ka bulan.