Zamboanga del Sur (Disyembre 17, 2019) - Gatusan ka mga katawhan ang nakapahimulos sa nagkalain-laing serbisyo sa gipahigayong launching sa Provincial Task Force ELCAC (end local communist armed conflict) adlawng Lunes sa Brgy. Dimalinao sa lungsod sa Bayog, Zamboanga del Sur isip kabahin sa Retooled Community Support Program (RCSP) sa Department of Interior and Local Government (DILG) nga usa ka national program aron tapuson ang pagkuyanap sa impluwensyang komunista sa nasud.
Atol sa maong aktibidad, gipangunahan ni Gov. Victor Yu ang ground breaking ceremony sa pag-construct ug pag-rehabilitate sa usa ka dakong farm-to-market road sa munisipyo sa Bayog. Ang maong kadalanan nga nagkantidad ug P21Million ang magkutay sa mga dalan sa Pulangbato, Dimalinao, ug Bantal.
Sa pamahayag ni Gov. Yu, iyang gikonsiderar nga usa ka prioridad nga proyekto ang pag-semento sa kadalanan tungod kay dako kini ug tabang aron mapadali ang pag-transport sa mga produkto sa kabukiran.
Iyang gidasig ang mga rebelde sa kabukiran nga tagamtamon ang mga benepisyo nga naangkon sa mga mibalik na sa sabakan sa gobyerno sama sa mga programa sa edukasyon ug panginabuhian alang sa mga rebel returness.
Giawhag usab niya ang ang mga barangay officials nga magsusi sa mga programa nga gitagana sa kagamhanan nga pwede nilang ipatuman sa ilang mga dapit aron makasinati sila ug kalambuan.
Ang maong inter-agency “serbisyo caravan” nga gihimo sa Dimalinao barangay center gitambongan sa nagkalain-laing national agencies sama sa DILG, NCIP, DOST, TESDA, DSWD, PNP, AFP ug mga division offices sa kagamhanang probinsyal sa Zamboanga del Sur nga midalit ug free medical services, livelihood orientation, skills training ug uban pang klase sa pagpangalagad.
Tumong sa maong kalihukan ang pag-edukar ug pagpahibalo sa komunidad mahitungod sa mga programa sa gobyerno aron paghatag kanila ug oportunidad
nga mapadangat ang ilang mga panginahanglan.
Matud pa ni Provincial Administrator Joefe Suson, mokabat sa P750million ang pondo nga nalikom sa probinsya gikan sa pledge of support nga nakuha niini gikan sa mga national ug local agencies. Ang nasampit nga pondo mao ang iapod-apod sa mga conflict-affected areas sa tibuok probinsya pinaagi sa mga serbisyo nga dad-on usab ngadto kanila.
Sa katapusan, giawhag sa gobernador ang kooperasyon sa katawhan aron mas mahimong hapsay uf mabungahon pag-implementar sa mga proyekto niini sa lalawigan.
Sigon pa niya nga isip lider sa probinsya, bisan pag nindot ang programa ug ang katawhan di molihok dili gihapon magmalampuson ang pagpatuman niini.
