(File Photo of ZDSMC)
Sa esklusibong pakighinabi sa Provincial Press Bureau kang OIC Chief of Hospital nga si Dr. Natzky Cagampang ug Chief of Clinic nga si Dr. Felipe Son adlaw nga Miyerkules, gibutyag sa mga doktor ang nahimong kausaban sa paghatag ug serbisyo alang sa mga pasyente sa Zamboanga del Sur Medical Center.
Gibalik pagpasabot ni Dr. Cagampang ang mga programa nga pwedeng ma-avail sa mga pasyente sa hospital ilabina ang MALASAKIT CENTER ug NO BALANCE BILLING Policy. Matud pa niya nga ang maka-avail sa NBB mao ang mga indigent patients, senior citizens nga walay insurance, PWD’s, single moms o undwed mothers NGA DUNAY PHILHEALTH. Silang tanan i-accommodate sa ward room ug walay pagabayran.
Gipasabot usab ni Dr. Cagampang ang mahitungod sa mga tambal sa hospital. Matud pa niya nga sa bulan sa Nobyembre dunay shortage sa tambal tungod sa bidding failure apan nasulbad na kini tungod sa gi-adopt nga consignment policy sa probinsya. Gidugang usab niya nga kon ugaling dunay makapalit ug tambal sa gawas ang pasyente, duna kini refund human ma-discharge gikan sa hospital apan gikinahanglan ang resibo niini.
Mahitungod sa Malasakit Center, gipahayag ni Cagampang nga dunay pondo nga P5million matag bulan ang hospital aron andam nga iserbisyo sa mga nanginahanglan. Kini nga pondo maoy itabang sa mga pasyente nga dunay excess billing gawas sa ilang PhilHealth assistance.
Mahitungod sa mga pasyente nga na-admit sa private hospitals, gipaklaro sa chief of hospitals nga maka-avail gihapon kini sa Malasakit assistance kung dunay justification gikan sa doktor. Usa ka pananglitan niini ang mga cancer or TB patients nga nabalhin sa private hospital tungod kay puno na ang mga isolation rooms sa ZDSMC. Gipahibalo usab niya nga kadtong naa sa private hospitals nga dunay excess billing unya buot mokuha ug financial assistance maka-avail ra gihapon pinaagi sa PSWDO.
Gibalita usab ni Dr. Cagampang nga naka-MOA ang ZDSMC sa Aisah Hospital sa San Pedro diin ang mga patients sa ward makabenepisyo gihapon sa zero billing policy.
Sa laing bahin, gipahayag ni Dr. Felipe Son, ang Chief of Clinics sa ZDSMC nga dunay umaabot nga HIV Treatment Hub nga I-establisar ang provincial hospital.
Matud pa ni Son nga naa na sila sa pre-assessment stage sa pagtukod sa maong pasilidad ug nakasubmit na sila ug requirements sa DOH.
Ang treatment hub usa ka proposal gikan ni Cong. Divina Grace Yu sa katuyoan nga maatiman ug matambalan ang mga HIV positive patients sa lalawigan ug dili na kinahanglan moadto sa Margosatubig o Zamboanga City.
Ang pagahimoong treatment facility kumpleto na sa manpower sama sa mga doctors and nurses ug duna na usab na-identigy nga lugar nga anaa ra usab sa hospital, sigon pa ni Dr. Son.
Apil usab sa mga plano sa provinical hospital ang pagmugna ug educational campaign mahitungod sa HIV aron mas mahatagan ug saktong impormasyon ang publiko ilabina sa pag-tratar sa mga HIV positive patients.
Sa mga dugang kalambuan sa ZDSMC, gipahayag usab sa mga doktor nga nasulbad na ang water supply problem sa maong balay tambalanan tungod kay nakakonektar nga kini sa water source sa provincial government complex niadtong adlaw nga Lunes.
Mahitungod sa bed capacity sa hospital, gipahibalo ni Dr. Cagampang nga nag-propose na sila ug 200 bed capacity aron maserbisyuhan ang nagkadaghang pasyente sa hospital.
Tulo usab ka mga elevators ang nasugod na pag-install sa medical center diin gipondohan kini gikan sa OPH. Naa na usab coming ATM machine sa outpatient department ug MOA nalang niini ang gihulat.
Gawas pa niini, duna na usab mga bag-ong doktor nga gidugang sa ZDSMC sama sa gastroenterologist, urologist, radiologist, pediatrician ug mga ROD (resident on duty) doctors.
Sa katapusan, gipasalamatan ni Dr. Cagampang ug Dr. Son ang makanunayong suporta ni Gov. Victor Yu ug Cong. Divina Yu sa medical center. Sigon pa nila nga ang instruction sa magtiayon nga ang mga pasyente maoy ilang tinuod nga “boss” ug kinahanglang tabangan ang dapat tabangan.
